مصحة رفق الموسم الأول - الجزء 32

وعند الساعة الثامنة وجدت سليمان يتصل بي .. 

جيدا يلا انزلي انا تحت .. استكملت ارتداء ملابسي ونزلت وانا احمل هم فوق قلبي لا أستطيع تحمل هذا الشعور .  ان نتواجد انا وسليمان وحسام بنفس المكان .. انا لم أعد أطيق ذلك .. كيف ساتعامل مع حسام بعد أن عرفت ما عرفته ..

وعندما فتحت باب السيارة لأركب لم اجد حسام .. 

ايه ده حسام ماجاش .. 

لا ياستي ماجاش ..

ليه كده ؟!

بيقول عنده شغل ومش هيقدر يمشي من المصحة ..

بس انا فاهم كويس جدا أن مش ده السبب..

امال ايه ؟!

هوه عاوز يسيبنا لوحدنا ؟

اصل الواد حسام ده حساس اوي .. سومة الحساس ؟..

ابتسمت نصف ابتسامة ..

مالك ياجيدا ؟!

ولا حاجة ..

طيب يلا بينا .. ثم أمسك يدي وقبلها ..وقام بتشغيل الكاست .. ( أغنية نعدي الشارع سوا .. كايروكي ؟)

 

مسكت ايديها عشان نعدي الشارع .. بعنيها قالت لي مفيش مانع .. عملت عبيط اكيد وفضلت ماسك .. بصتلي بصة حادة وقالت لي حاسب .. قلبت الموضوع في ثانية هزار .. خدتها السينما عزمتها على فشار ..والفيلم كان أكشن جبار .. والبطل فيه كالعادة بيكسب الأشرار .. يامه نفسي الفيلم يخلص والنور ينور ..خايف اقرب اكتر خايف أتهور .. مش عارف اصدق ولا عارف منين أبدأ .. مش عارفه أفكر متوتر مش عارف أعبر ..

مستني اليوم ده انا من زمان .. أفتح قلبي واقولها كل الكلام.. وأمسك ايديها ونعدي الشارع سوا ....)

كنت سعيدة وانا مع سليمان ولكن فرحة غير مكتملة .. وكأنه شئ ما يحزنني  .. انا أحبه من اول لحظه .. وهو أيضا .. 

ونحن في طريقنا للبيت بعد أن إنتصف الليل ..

تحدث معي سليمان وقال..

جيدا هنتجوز امتي بقي ..

ابتسمت خجلا ..ونظرت الي الجهه الأخري ..

فوضع يده على وجهي واقترب مني ..

مش عاوز نبعد عن بعض ..عاوزك تبقي معايا ..

وانا كمان ..

بصي الحمد لله زين بقي كويس ..يبقي مفيش داعي نستني ..

ايه رأيك نبدأ ننزل من بكرة ننقي العفش وكده ..

سليمان ..

نعم يا قلب سليمان ..

عندي طلب  ..

اؤمري ..

عاوزه أفضل في شقتي .. انا من الناس ايلي بتتأقلم عالأماكن بصعوبة .. ممكن يا سليمان ..

سكت قليلا ليفكر ..ثم نظر لي وابتسم ابتسامته الهادئه ..

ماشي ياحبيبتي ايلي تشوفيه ..

طيب عموما انا عن نفسي مش محتاجة حاجه ولسه كنت مبيضة الشقة اصلا .. 

انت شوفتها لو حابب تغير حاجه في الديكورات براحتك .. 

لا بجد اصلا عجبتني جدا .. مفيش اي حاجه  عاوز اغيرها طالما انتي ايلي اخترتيها.. 

بس هنجيب اوضة نوم طبعا انتي سريرك سنجل ؟..

اوك ماشي ..

وعاوزين نعمل دريسنج روم ..اعتقد عندك مكان صح ؟؟ 

ايوه انا اصلا عندي دريسنج روم .. انت ماتفرجتش عالشقة ..

لا نفسي اتفرج .. هطلع معاكي بقي ؟؟

لا ياحبيبي ابقي هات مامتك وباباك بقي بكره الجمعه بعد الصلاة هدوقك اكلي ؟..

بتعرفي تطبخي ؟!

 

شويه .. يعني متعلمه شوية حاجات ؟..

اي حاجه من ايدك هتعجبني؟

طيب بقولك ايه هجيب معايا حسام ..

استغفر الله العظيم .. كل اما أحاول اركز معاه يجيبلي سيرة حسام ..يشتتني و يوترني ويتعب اعصابي ..

ايه يابنتي ماتردي عليا ..

ايه بتقول ايه ..

بقولك هجيب حسام معايا ماشي والا فيه مشكلة ..

لا طبعا خليه ييجي ايه المشكلة ..

طيب بصي كلميه انتي عشان هيتكسف ييجي ..

لما تيجي منك انتي تبقي أحسن ..

يادي النيلة بقي ..؟

اوك ياسليمان هكلمه حاضر ..

اوعي تنسي ..

اول ماتطلعي كلميه..

ماشي مش هنسي ..

جيدا ..

نعم ..

انتي نورتي حياتي بجد ..انا قبلك كنت انسان محطم والله ماكنت عايش .. كنت ميت .. 

حبيبي انا كمان كنت وحيدة من قبلك ..كنت عايشة حالة حزن مش بتنتهي ..

خلاص ياجيدا انا عمري ماهسيبك .. عمرك ماهتبقي لوحدك ؟

مش هتحكيلي بقي يا سليمان ..

احكيلك ايه ؟!

موضوع مراتك واخوك ..

عبس وغضب واحمر وجهه .. حتي أنه أخافني كثيرا مالهم اخويا ومراتي .. 

يعني عاوزه اعرف ازاي اخوك مات هوه كان عيان ؟! قلتها وانا اعرف تماما أنه مات منتحر ..

اه كان عيان .. 

كان عنده ايه ؟!

كان عيان ياجيدا .. وخلاص

طيب مالك كده متعصب عليا قلتها بدلال ثم استدرت ..

 

وضع يده على كتفي ثم وقف باتجاهي واحتضنني بقوة ..

حقك عليا ياحبيبتي معلش اصل مش بحب اتكلم في الموضوع ده ..

بصي انا اهوه ماسألتكيش عن أي حاجه ازاي ..

 

 لأني عارف إن ايلي قبل كده دي حاجات ماتت مش عاوزين نتكلم فيها .. 

كان ممكن أسألك.. كنتي على علاقه بحد قبلي والا لا .. 

وبما انك كنتي عايشه في بلد اجنبيه من وانتي صغيرة كان المفروض اول حاجه أسألك عليها ..

 انتي لسه محافظة على نفسك والا لأ ..

لكن انا وأقسم بالله مايفرق معايا اي حاجه حصلت قبل ما أشوفك .. 

انا معاكي حاسس اني اتولدت من جديد .. كل حاجه بحسها معاكي كأني بعيشها لاول مرة بقيت عامل زي المراهقين وانا هكمل الاربعين بعد كام شهر .. 

 

طيب ياحبيبي أنا آسفه.. مش هسأل في حاجه تاني ..

جيدا ..

مش عاوزك تكوني زعلانه مني ..

 انا عمري ما ازعل منك ..ياسليمان ..

طيب ماتجيبي بقي ؟

بس بقي يابني ؟

والله ماهسيبك الا أما تجيبي ؟..

اسكت بقي .. الناس طالعه نازلة حد يشوفنا يقول ايه ..

وكمان حرام .. 

لا عادي في الخد مش حرام ..

لا والله ؟..

ده دين جديد ده؟

بحبك اوي ..

قبلني برقة على خدي فجأة..  فجريت .. وصعدت السلم .

 

يتبع

مصحة رفق الموسم الأول - الجزء 33

ما رأيك بما قرأت؟
اذا أعجبك المقال اضغط زر متابعة للكاتب و شاركه مع الأصدقاء على مواقع التواصل الاجتماعي حتى يتسنى للكاتب نشر المزيد من المقالات الجديدة و المفيدة و الإيجابية..

هل تحب القراءة؟ كن على اطلاع دائم بآخر الأخبار من خلال الانضمام مجاناً إلى نشرة جوَّك الإلكترونية

تعليقات
DiDi Elekyabi - Jul 24, 2020 - أضف ردا

حلوة اوي ياريت تتعمل فيلم

يجب أن تكون مسجل دخول لإضافة تعليق.

يجب أن تكون مسجل دخول لإضافة تعليق.

مقالات ذات صلة
نبذة عن الكاتب

كاتبة قصص وروايات