مصحة رفق الموسم الأول - الجزء 30

مر يومان وقد تحسنت وبدأت أخرج الي العمل ولكن زين مازال بالمشفي يقومون بمتابعة حالته خوفا من حدوث مضاعفات ..

كان سليمان تلك الفترة منشغل كثيرا مع ابنه لا يستطع أن يأتي الي المصحة ويتركه.. 

صباح الخير ياحسام ..

 اهلا صباح النور حمد الله عالسلامة نورتي المصحة .. قالت رنين حمد الله علي سلامتك يادكتورة ..

 الله يسلمك شكرا؟..

استأذن حسام لانه كان  لديه الكثير من العمل لقد كان يتابع الحالات ويشرف علي الأطباء ذلك لعدم تواجد سليمان بالمصحة ..

انا آسفة ياجيدا اني مشيت وسيبتك وانتي تعبانة .. بس للأسف إضطريت امشي .. 

اه ما هو حسام قال لي ..

قال لك ايه بقي..

قال إن مامتك كلمتك وانتي اضطريتي تنزلي..

وصدقتيه ؟! 

اه صدقته هكدبه ليه ؟! 

عشان مش ده ايلي حصل ..  

امال ايه بقي ايلي حصل .. 

الدكتور المحترم انتهز فرصة اننا لوحدنا وكان عاوز يتهجم عليا .. 

طبعا اتخانقت معاه وماقدرتش استني لحظة .. سامحيني اني سيبتك بس كان غصب عني ..

بقولك ايه يارنين .. انتي محتاجه تتعالجي ماتيجي أقعد معاكي كام جلسة كده ..

ايه انتي بتقولي ايه ؟..

قلت بلهجة حادة ..بقول ايلي اسمعتيه .. انتي بني آدمه كدابة ..

لا طبعا انا مش بكدب ..قالتها بصوت مهزوز متقطع 

 

بقولك ايه .. انا حاطة كاميرات في شقتي وشفت كل حاجه .. فمتحاوليش انك تشوهي سمعة انسان محترم  .. روحي عالجي نفسك والا ابعدي عننا ..

 

نظرت لي نظرة مطولة كلها حقد وغل ثم خرجت بخطوات مسرعة أثناء دخول حسام من الباب فإصتدمت به بقوة .. 

مالك يابنتي بالراحة فيه ايه ؟ .. 

اوعي من وشي كده .. قالتها وهي تدفعه لتمر ..

ايه ده فيه ايه مالها دي ..

سيبك منها ..

لا لازم أعرف فيه ايه .. عملتلها ايه .. خلاص بقي ياجيدا مش هينفع الخطة  ايلي عملتيها دي .. ده كانت فكرة مهببة ..؟

ليه يعني بالعكس ..الخطة دي خليتني اعرف حاجات كتير ..

لا والله شوفي ازاي.. وعرفتي ايه بقي يا أم العريف ؟..

عرفت أن رنين دي بني آدمه مريضه ومش كويسة .. اياك بقي تفكر فيها تاني والا تبقي انسان مغفل ..

 

احترمي نفسك .. وقوليلي ليه بتقولي عليها كده ..

 

البني آدمه ايلي انت ضيعت تمن سنين من عمرك بتحبها .. لما لقت انك مهتم بيا حبت توقع بيننا .

..جت وقالت لي انك انسان مش كويس وانت بتاع ستات .. وقالت ان ده السبب ايلي خلاها ترفضك .. ودلوقتي حالا كانت لسه بتقول لي انك اتهجمت عليها لما كنتوا عندي وانا عيانه وده السبب ايلي خلاها تمشي .. بس انا قولتلها اني شفت كل حاجه في الكاميرا ..

كاميرا ايه ؟! 

الكاميرا ايللي في بيتي ..

انتي حاطة كاميرات في بيتك ؟..  

لا ؟

امال ايه ؟. 

عادي ضحكت عليها عشان أتأكد انها كدابة ..واتأكدت الحمد لله ..

هوه انتي كنتي محتاجه تتأكدي اني انسان كويس ..يعني مالكيش نظرة تميزي الشخص إذا كان محترم أو لأ..

لا بصراحة ؟

انا حمارة جدا في الموضوع ده ..

ليه بتقولي كده ؟! 

عشان بتصدم في الناس ..

يعني ابن خالتي أدهم ده كنا صحاب جدا من واحنا صغيرين وكنت يعتبره زي أخويا وطلع في الآخر زبالة ..

ليه عمل ايه ؟! 

عمل ايلي عمله اهو راح لحاله ..

بقولك ايه ياحسام .. انت مالك ماتفاجئتش وماتأثرتش لما قولتلك كلام رنين ؟!

عادي عشان عارف .. 

عارف منين ؟..

سليمان حكالي.. 

لا والله هو لحق يقولك ؟..

اه يابنتي مابيخبيش عني حاجه .. 

ماشي ياسيدي هغير انا بقي كده ..؟

لا ماتغيريش ..ماهو اول مابيشوفك بينسي اني موجود ..

طيب أنا رايحة بقي أشوف أكل عيشي بدال الرغي ده ؟.. 

اكل عيشك ايه يا بنتي ده انتي مرات ال boss ؟

 

خرجت من الغرفة ولكن تركت حقيبتي فرجعت كي آخذها .. وعند الباب تعثرت وكنت سأقع فخرج حذائي من قدمي فوقفت كي أرتديه جيدا وحينها سمعت حسام يتحدث مع الممرضة .. ويصيح..

يعني ايه مش لاقياها .. هتكون راحت فين يعني انشقت الأرض وبلعتها . 

حضرتك انا ضورت عالأشندة فكل حته فاضل بس مكتب ضاكتور سليمان .. هوه ايلي مادخلتوش .. أروح أدور هناك؟!

انتي مجنونه ..ايه ايلي هيودي الأجندة بتاعتي فمكتب سليمان ..

حينها تسمرت مكاني .. أهذه الأجندة ليست لسليمان ؟..

والكلام الذي قرأته بداخلها .. ألم يكن هذا خطه ..؟

يارب ايلي بفكر فيه يكون غلط .. ذهبت الي غرفة المكتب وأخذت الأجندة سريعا ثم وضعتها بخزانتي .. ثم اتصلت بسليمان ..

حبيبي عامل ايه ..

الحمد لله انتي عامله ايه وحشتيني..

وانت كمان ..

زين عامل ايه دلوقتي ..

الحمد لله احسن كتير حاسس ان الدكتور هيكتبله علي خروج النهاردة أو بكره بالكتير ..

ان شاء الله ..

وحشتني اوي يا سليمان .. 

وانتي كمان ياحبيبتي ..

مالك فيه ايه حاسس انك عاوزه تقوليلي حاجه ..

لا ابدا انا بس مفتقداك اوي انت مابقتش بتكلمني كتير زي الاول  ؟..

حبيبتي أنا آسف سامحيني انا عارف اني انشغلت عنك وعارف اني مقصر معاكي وبعدين انا مش بعرف أقول كلام حلو وازوق الكلام مش تخصصي ده تخصص حسام انا ماليش في النحنحة؟.. 

لا طبعا بتعتذر علي ايه أنا اصلا بهزر معاك ؟.. انا بحبك كده زي ما انت عاجبني كلك علي بعضك ؟

ايه ده انتي عارفه الاغنيه دي ؟.. 

أغنية ايه ؟!

عاجبني كلك ياوله ؟ ..

ايه ده لا معرفهاش ..؟ فيه اغنية اسمها كده؟! 

ايوه يابنتي .. دي للفنان القدير عبد الباسط حمودة ؟..

لا طالما كده بقي يبقي لازم اسمعها؟

 

سليمان

عيون سليمان ..

 عاوزه أسألك علي حاجه بس تجاوبني بصراحة ..

اسألي ..

هوه انت كنت بتشوفني وانا فى كلاسز الزومبا مع المرضي 

لا طبعا ايه الهبل ده هعمل كده ليه ..

يعني انت عمرك ماشوفتني وانا برقص زومبا ..

لا ماشوفتكيش ..بس نفسي اوي؟

بطل قلة ادب بقي ..

لا والله بس مش فاهم ايه سبب السؤال ؟! 

لا عادي اصل كنت عاوزه أشيل الوشم ايلي علي دراعي ومتردده ..وكنت هسألك عن رأيك فيه لو عاجبك أخليه؟

وشم .. انتي عاملة وشم .. انا ماشوفتهوش ..لما جيتلك البيت كنتي لابسه بكم .طيب مش كنتي تقوليلي عشان اشوفه ؟..

بس بقي يابني ..

ابنك ايه بس .. وحشتيني اوي ..وعاوز اشوفك  انتي والوشم ؟.. 

وانت كمان ..

بقولك ايه ؟!

ماتشيليش الوشم عشان انا اكيد هحبه

 

تأكدت من أن حسام من كتب تلك الكلمات .. وحزنت كثيرا من أجله .. 

لماذا انا بالذات ..

فقد عاش لسنوات يتألم من حب ميئوس منه ..حب من طرف واحد ..

 وعندما بدأ أن يتعافي من ذلك الحب .. تعلق بي انا ؟.. 

أشعر بالخوف  .. إذا ماعرف سليمان شئ كهذا .. سيخسر صديق عمره .. وسأكون انا السبب .. يجب أن انسي كل ماحدث سآخذ هذه الأجندة وأحرقها .. ثم أبدأ في وضع حدود بيني وبين حسام كي لا تتوطد علاقتنا أكثر .. 

ولكن ما الذي جاء بهذه الأجندة الي مكتب سليمان .. 

لابد أن تلك الشيطانية التي تدعي رنين كانت تريد أن يري سليمان ماكتبه حسام لتوقع بينهم العداوة ..

 

 منك لله ياشيخة ده انتي شيطانه مش بني آدمة ..

يتبع

مصحة رفق الموسم الأول - الجزء 31

ما رأيك بما قرأت؟
اذا أعجبك المقال اضغط زر متابعة للكاتب و شاركه مع الأصدقاء على مواقع التواصل الاجتماعي حتى يتسنى للكاتب نشر المزيد من المقالات الجديدة و المفيدة و الإيجابية..

هل تحب القراءة؟ كن على اطلاع دائم بآخر الأخبار من خلال الانضمام مجاناً إلى نشرة جوَّك الإلكترونية

تعليقات
Hala Essa - Jul 22, 2020 - أضف ردا

يااااا مجاش في دماغي ابدا ان حسام يكون بيحب جيدا تفتكري في دماغي صح ولا ده فخ من رنين 😞

يجب أن تكون مسجل دخول لإضافة تعليق.

يجب أن تكون مسجل دخول لإضافة تعليق.

مقالات ذات صلة
نبذة عن الكاتب

كاتبة قصص وروايات