قصيدتان من ديوان"دموع سِرقة".. للشاعر محمود رأفت

القصيدة الأولى: الكباري
الكباري اللي ف بلدنا ناقصها كوبري
والشوارع ناقصة بني أدمين بجد
والحواري الطيبة اللي سكننا فيها
ضللت على روحنا خطفت منَّا حد
في السكك إشارات بتلمع والمدينة
واقفة في الزور زي شوكة وغارزة فينا
لما جينا ف مرة نسأل شخص ماشي عن السَّكِينَة
بص حواليه يلتفت بعيونه بس ماقالش رد
شِبرِي لو كان قدّ شِبْرَك كنا تهنا
عمري لو كان قد عُمرَك بالثواني
مش ضروري نشوف ف نفس اللحظة روحنا
شخص واحد والحقيقة شخص تاني
واللي كان ويَّانا من ثانية إلَّا لحظة
هو نفسه اللي انتهت فيه المعاني
وانطلق يِزْعَق بصوته ف كل مأدنة
والجرس لما انخرس صرخت سناني
تَكْتِكِتْ م الرعب على روح نازلة هَدّ
الكباري اللي ف بلدنا أنا تهت فيها
عشت وسط الزحمة نازل فيا شَدّ
قلت يمكن تنعدل فيا المدينة
قلت يمكن، بس يمكن آخره سَدّ

القصيدة الثانية: بشر مُنْحَطّ
الذكريات مليانة بني أدمين
بينطوا منها - لا في نجاة ولا شط
اللي انتهى في الحب يا مساكين
كوم ذكريات فيها بشر منحط
كان البجع بيقول كلام ع البط
والديك بيدن فوق مقام العجم
واللي سكن في القلب منّه اتلط
واللي مشى هو اللي وحده اتلجَمْ
واللي حبسناه فينا
قال يعني فينا المدينة!
لقيناه شيطان واترجم
يا مؤمنين بالفرصة والبنات القرصة
والضحكة لو جُرصة
ومؤمنين بالحكمة في التواريخ
ومزوقين الكلمة بالبسمة
وموحدين صفكم
وجايّ من صلبكم عيال أحرار
بيعدوا خط النار
وبيكتبوا بدمهم شهادة استثمار في حب أوطانهم
إنتوا الأمل
لو الجراح تلتئم والذكريات تكتمل
ونشوف صورنا وأُسَرنا
ونشوف عيالنا وشجرنا
وحوش في دارنا
ونشوف بيوتنا وعَمَارنا
ونشوف عيون الصبايا اتملت عصافير
حواديت كتير
ونشوف جناب الأمير
ده اللي احنا اختارناه
ماشيين كتير حواليه
قدامه أو من وراه
رافع إيدينا معاه
نعرف حدود الوطن مفتوحة للراجعين
اللي سابونا وسافروا من كوم سنين
فاتحين لهم أحضاننا
ونشوف أملنا في عيون الولاد
ونشوف بجد وطنَّا
مرجَّع الأمجاد..

معلومات عن محمود رأفت

محمود رأفت
- شاعر عامية مصري ومصمم جرافيك.

• المنصورة/مصر
  - ديوان "رقصة على شبر مية" دار ابن رشد.
  - ديوان "التجربة أسرار" الهيئة العامة لقصور الثقافة.
  - شارك في ديوان جماعي باسم "خطوتنا الجاية".
• - شارك في كتاب جماعي بعنوان "سكر بنات".
  - شارك في ديوان جماعي بعنوان "القهوجية".
  - مركزأول جائزة شيماء الصباغ عن ديوان "رقصة على شبر مية".
• - مركز أول جائزة بشير عياد لشعر العامية.
  - العديد من الجوائز والمراكز في الشعر والنحت.