قالولي اكتبلها أشعار
نسيت الوزن والقافية..
قالولي اوصفلنا عيونها
سرحت بروحي في الملكوت
وتهت في فضا كونها..
وقلت وعيني مقفولة
زرقا لون السما صافية
لا بيهمها شتا أو صيف
تملي عيونها دي دافية
ومهما تشوف عيون في الكون
تملي عيونها دي كافية
ومهما تفوت عليا عيون
تملي عيونها دي وافية
ولو عاوزين للسما ألوان
بياخدوا م العيون لونها
دا أنا اللي جيت أوصفها
تهت في فضا كونها
عيونها في الفضا نجمة
تنور ليل شريد حيران
في نورها بيمشي ويسافر
ويسبح لبر أمان
وأنا عالصبر مش قادر
ولا عالشوق أنا صابر
عديت بلاد من الأحزان
عنيها ملجأ التايه في ليل غربة
عنيها واحة م الأمل وحنان
عنيكي مش عصا موسى
عيونهم مش حبال فرعون
عنيكي وديان من الجنة
تعيش فيهم وتتهنى
عنيكي كل ما أتمنى
عيونها لون من الحنة
عنيكي دول ياقوت مكنون
عنيكي مش عصا موسى
عيونهم مش حبال فرعون
يجب عليك تسجيل الدخول أولاً لإضافة تعليق.