قالولي فيه في المصري عيوب ... أنــا قلت طبعـــاً ما بيخلاش
قالولي ما أنت مدحـــت كتيـــر ... قلت وعيوبه هقول منساش
...
في بعضهم تلقر رخـــــامة ......... ويعرفوك للمصلحـــــــة
والبعض محتاج فهَّــــامة ............. ويصدعك بالصرصعة
...
وناس تعيــد فـي كـلام وتزيد ...... لا يراعوا وقتك ولا حالك
ويجيبو سيرة الناس ده أكيد ........... وتنصحو يقولــك مالـك
...
شبــاب صغيــر بيدخــن ........ والبانجو دهب يبقى تحيــــة
ومخدرات حاجة تعكنن ......... معـــرفش فين الداخليــــــة؟!
...
والغش ده مالي الأسواق ........... والاحتكار يبقى شطارة
ومطبلاتى وأهــل نفـــاق ........... والرشوة تبـدأ بسجـارة
...
وموظفين عندنا بالكــوم ........... قاعدين يفكروا في علاوة
على المكاتب دَشّ ونوم ................ كسول ونفسه في بقلاوة
...
ناس تشتغل لو فوق راسها ....... صاحب العمل وإن غاب يهرب
وناس مانعــرفش أساسهـا ........ تــــذل فـــي الخَلْــــق وتِتْعـــِب
...
كلامنا أكتر م الأفعال ............. وخطة التعليم واهيـــــة
وهموم كتير تقلت أحمال .......... والمسؤولية بقت تايهة
...
وناس تخبــط علــى بابهــا ......... يرجعوك من غير رحمة!
ومن التفاهة واخدة منابها ......... وكل يوم واكلين لحمــة
...
في الموضة بص على بناتنا ....... بيقلــدوا تقليــد أعمـــى
حاجات بعيد عـــن أحوالنــا ....... وقيمنا تاهت في الزحمة
...
مستهلكين على طول الخط ....... حتى الفانوس استوردناه
وكتير قوى ما يفكـو الخـط ....... نتقــدم إزاى يـا ولـــداه؟!
...
وناس حقودة على نجاحك ......... وإن كنت موهوب يحفر لك
ويعيش يحطم في كفاحك .......... ويكــرهك أنــــت وأهلــــك !
...
في كل عيلة تلاقى خلاف ........ ويكرهوا الخير للتاني
ويشمتــوا ولا حــد يخاف ........ وليل نهار بس أغاني
...
شوارعنا تشكي وتتألم ....... مفيش نضافة غير الإزعاج!
وكلو يرمي ويتكلم ....... والعيب في غيره بدون إحراج
...
يهتمــوا دايمـــاً بسفاسف ......... الكورة عندنا فوق العلم
هننهض إزاى أنا خايف .......... نفضل كده ويزيد الهم
...
فيه عيوب كتير بس نسيتها ...... حياتنــا مـن غيرها رشيدة
وكـــان لا بدَّ في آخرتهـا ...... أسكت عشان أنهى قصيدة
ستجد أيضاً على منصَّة جوَّك
- تعرف على 7 أماكن كورسات انجليزي معتمدة
- تعرف الآن على 30 قانون من قوانين مورفي عن الحب
يجب عليك تسجيل الدخول أولاً لإضافة تعليق.